އެމެރިކާގެ ރައީސް ޑޮނަލްޑް ޓްރަމްޕާއި ލުބުނާނުގެ ރައީސް ޖޯސެފް އައުން ވައިޓް ހައުސްގައި އަންގާރަ ދުވަހު ބައްދަލުކުރައްވައި، ލުބުނާނަށް ބޮޑެތި އެހީތަކެއް ދެއްވާނެ ކަމަށް ޓްރަމްޕް ވިދާޅުވެއްޖެއެވެ. މިއީ ފާއިތުވި 17 އަހަރުގެ ތެރޭގައި ލުބުނާނުގެ ރައީސަކު ވައިޓް ހައުސްއަށް ކުރެއްވި ފުރަތަމަ ޒިޔާރަތެވެ.

މި ބައްދަލުވުމުގައި މައިގަނޑު ގޮތެއްގައި މަޝްވަރާކުރައްވާފައިވަނީ އިސްރާއީލާއި އީރާނުގެ މަދަދު ލިބޭ ހިޒްބުﷲ ޖަމާއަތާ ދެމެދު ހިނގަމުންދާ ހަމަނުޖެހުންތަކަށްފަހު، ސަރަހައްދީ ހަމަޖެހުން ގާއިމުކުރުމާ ގުޅޭގޮތުންނެވެ. ރިޕޯޓުތައް ބުނާ ގޮތުގައި، އައުންގެ މައިގަނޑު އަމާޒަކީ ލުބުނާނުގެ ދެކުނުން އިސްރާއީލު ސިފައިން ފުރިހަމައަށް ފޭބުމަށާއި، އެ ސަރަހައްދުތަކުގެ ކޮންޓްރޯލް ލުބުނާނުގެ އަސްކަރިއްޔާއިން ނެގުމަށް އެމެރިކާގެ އެހީތެރިކަން ހޯއްދެވުމެވެ.

ޓްރަމްޕް ވިދާޅުވި ގޮތުގައި، ލުބުނާނަކީ ވަރަށް ބޮޑަށް ނިކަމެތިކަން ލިބިފައިވާ ގައުމެއް ކަމަށާއި، ކުރިއަށް އޮތް ތަނުގައި އެ ގައުމަށް ހައްގުވާ އިހުތިރާމާއެކު އެމެރިކާއިން އެހީތެރިކަން ފޯރުކޮށްދޭނެއެވެ. ހަމައެހެންމެ، ލުބުނާނުގެ އަސްކަރިއްޔާއަށް އެމެރިކާއިން ދެމުންގެންދާ އެހީތެރިކަން މެދުނުކެނޑި ކުރިއަށް ގެންދިއުމަށް އައުން ވަނީ އެދިވަޑައިގެންފައެވެ. އައުން ވިދާޅުވި ގޮތުގައި، އެމެރިކާގެ އެހީތެރިކަމާ ނުލައި ލުބުނާނުގެ ދެކުނުގައި ހަމަޖެހުން ގާއިމުކުރުމަކީ އުނދަގޫ ކަމަކަށް ވާނެއެވެ. މީގެ އިތުރުން، ލުބުނާނުގެ އަސްކަރިއްޔާއަށް އެހީތެރިވުމުގެ ގޮތުން 36 މިލިއަން ޑޮލަރުގެ ފަންޑެއް ހަމަޖައްސައިދިނުމަށް އެމެރިކާގެ ކޮންގްރެސްއަށް ހުށަހަޅާފައިވާ ކަމަށްވެސް ރިޕޯޓުތައް ބުނެއެވެ.

އެމެރިކާގެ މެދުވެރިވުމާއެކު އެކުލަވާލާފައިވާ އެއްބަސްވުމުގެ ދަށުން، ލުބުނާނުގެ ދެކުނުގައި ކަނޑައަޅާފައިވާ ހާއްސަ ސަރަހައްދުތަކަކުން އިސްރާއީލު ސިފައިން ފައިބައި، އެ ތަންތަނުގެ ސަލާމަތީ ކަންކަން ބެލެހެއްޓުމާ ލުބުނާނުގެ އަސްކަރިއްޔާއިން އަންނަނީ ހަވާލުވަމުންނެވެ. ނަމަވެސް، މި މަސައްކަތުގައި އެންމެ ބޮޑު ގޮންޖެހުމަކަށް ވެފައިވަނީ، ހިޒްބުﷲ ޖަމާއަތުން ހަތިޔާރު ބެހެއްޓުމަށް ދެކޮޅުހެދުމެވެ.

އެމެރިކާގެ އޮފިޝަލުންނާ ހަވާލާދީ މީޑިއާތަކުން ރިޕޯޓުކޮށްފައިވާ ގޮތުގައި، ޓްރަމްޕްގެ ސަރުކާރުން އުންމީދުކުރަނީ ލުބުނާނުގެ އަސްކަރިއްޔާ ބާރުވެރިކުރުވައިގެން، އީރާނުގެ ނުފޫޒު އެ ގައުމުގައި ކުޑަކުރުމަށެވެ. މި ބައްދަލުވުން ނިމިފައިވަނީ، ލުބުނާނުގެ ދެކުނުގެ ބައެއް ސަރަހައްދުތަކުގައި ލުބުނާނުގެ ސިފައިން ހަރަކާތްތެރިވާން ފަށާފައިވާ ދަނޑިވަޅެއްގައެވެ.