އެމެރިކާގެ ރައީސް ޑޮނަލްޑް ޓްރަމްޕާ ބައްދަލުކުރެއްވުމަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވޮޝިންޓަނަށް ކުރައްވާ ދަތުރުފުޅާ ދިމާކޮށް، އީރާނުގެ ވައިގެ ދިފާއީ ނިޒާމުތައް ވަރުގަދަކޮށްފައިވާ ކަމަށް އެ ގައުމުގެ އަސްކަރިއްޔާއިން ބުނެފިއެވެ.

ނަތަންޔާހޫ ވިދާޅުވި ގޮތުގައި، ޓްރަމްޕާއެކު ބާއްވާ ބައްދަލުވުމުގެ އެޖެންޑާގައި އީރާނުގެ މައްސަލަ ހިމެނެއެވެ. މި ދަތުރުފުޅުގައި އެމެރިކާގެ ކުރީގެ ސެނެޓަރު ލިންޑްސީ ގްރަހަމްގެ ހަނދާނުގައި ބާއްވާ ރަސްމިއްޔާތެއްގައި ނަތަންޔާހޫ ބައިވެރިވެވަޑައިގަންނަވާނެއެވެ. މިއީ އެމެރިކާއިން އީރާނަށް ދެމުންދިޔަ ހަމަލާތައް މެދުކަނޑާލާފައިވާ ދަނޑިވަޅެއްގައި ކުރައްވާ ދަތުރުފުޅެކެވެ.

އީރާނުގެ ތަސްނީމް ނިއުސް އެޖެންސީން ރިޕޯޓުކޮށްފައިވާ ގޮތުގައި، އެ ގައުމުގެ އަސްކަރިއްޔާގެ ތަރުޖަމާނު ބްރިގޭޑިއާ ޖެނެރަލް މުހައްމަދު އަކްރަމީނިއާ ވިދާޅުވީ، ހަމަލާތައް މެދުކަނޑާލާފައި އޮތް ތިން މަސް ދުވަހުގެ މުއްދަތުގެ ބޭނުން ހިފައި، އީރާނުގެ ވައިގެ ދިފާއީ ނިޒާމުތައް މަރާމާތުކޮށް އާ އާލާތްތައް އަސްކަރިއްޔާއަށް އިތުރުކޮށްފައިވާ ކަމަށެވެ. އަދި ކުރިމަތިވެދާނެ ކޮންމެ ހާލަތަކަށް އީރާނުގެ އަސްކަރިއްޔާ އޮތީ ތައްޔާރަށް ކަމަށް އޭނާ ވިދާޅުވިއެވެ.

މީގެ އިތުރުން، އީރާނުގެ އިސްނާ ނިއުސް އެޖެންސީއާ ހަވާލާދީ އަކްރަމީނިއާ ވިދާޅުވީ، ހޮރުމުޒް ކަނޑުއޮޅީގައި އެމެރިކާއިން ހާސިލުކުރަން ބޭނުންވި ލަނޑުދަނޑިތައް ހާސިލުވެފައި ނުވާ ކަމަށާއި އީރާން ބަލިކަށިކުރުމުގައި އެމެރިކާ ނާކާމިޔާބުވެފައިވާ ކަމަށެވެ. އަދި އެމެރިކާއިން މިހާރު މަސައްކަތް ކުރަމުން ދަނީ އިޒްރޭލުގެ ހުއްދައާ އެކު ހަނގުރާމައިން ވަކިވުމުގެ އާ ސްޓްރެޓެޖީއެއް ހޯދުމަށް ކަމަށްވެސް އޭނާ ވިދާޅުވިއެވެ.

އަކްރަމީނިއާ އިތުރަށް ވިދާޅުވި ގޮތުގައި، އެމެރިކާއިން ހަމަލާތައް ކުރިއަށްގެންގޮސްފިނަމަ ހަނގުރާމަ އިތުރަށް ފުޅާވުމަކީ އެކަށީގެންވާ ކަމެކެވެ. އަދި އެފަދަ ހާލަތަކާ ކުރިމަތިލުމަށް އީރާނުން އާ ސްޓްރެޓެޖީތަކެއް އެކުލަވާލާފައިވާ ކަމަށް އޭނާ ވިދާޅުވިއެވެ.