ތަމަޅަ ސިނަމާގެ މަޝްހޫރު އެކްޓަރު ރަޖްނީކާންތުގެ ކުރިއަށް އޮތް ފިލްމު "ދަރުމަން"ގެ ކާސްޓާ އެކްޓްރެސް ނަޔަންތާރާ ގުޅިއްޖެއެވެ. ފިލްމު އުފައްދާ ފަރާތުން އިއްޔެވަނީ ނަޔަންތާރާ މި ފިލްމުގައި ބައިވެރިވާކަން ރަސްމީކޮށް އިއުލާންކޮށްފައެވެ. ހިންދުސްތާން ޓައިމްސްއިން ރިޕޯޓުކޮށްފައިވާ ގޮތުގައި، މި އިއުލާނާ ގުޅިގެން ނަޔަންތާރާ ވަނީ ރަޖްނީކާންތަކީ ހުރި ހަމައެކަނި ސުޕަސްޓާރު ކަމަށް ބުނެފައެވެ.

މިއީ ފަސް އަހަރުގެ މެދުކެނޑުމަކަށް ފަހު ރަޖްނީކާންތާއި ނަޔަންތާރާ އެކުގައި މަސައްކަތްކުރާ ފުރަތަމަ ފަހަރެވެ.

މީގެ ކުރިން މި ދެ ތަރިން ވަނީ 2005 ވަނަ އަހަރު ނުކުތް "ޗަންދުރަމުކީ"، 2007 ވަނަ އަހަރުގެ "ސިވާޖީ"، 2008 ވަނަ އަހަރުގެ "ކުސެލަން" އަދި 2020 ވަނަ އަހަރުގެ "ދަރުބާރު"ގެ އިތުރުން "އަންނާތޭ" ހިމެނޭހެން ފަސް ފިލްމެއްގައި އެކުގައި މަސައްކަތްކޮށްފައެވެ.

އަޝްވަތު މަރިމުތު ޑައިރެކްޓުކުރާ "ދަރުމަން" ޕްރޮޑިއުސްކުރަނީ ކަމަލް ހާސަންގެ ރާޖް ކަމަލް ފިލްމްސް އިންޓަނޭޝަނަލްއާއި އާރު މަހެންދުރަން ގުޅިގެންނެވެ. ސިނަމާ އެކްސްޕްރެސްއިން ރިޕޯޓުކޮށްފައިވާ ގޮތުގައި، މި ފިލްމުގެ ކާސްޓުގައި ސިމްރަން، ޔޯގީ ބާބޫ އަދި ރާޝީ ކަންނާ ހިމެނެއެވެ. މި ފިލްމުގެ ޝޫޓިން މިހާރު ކުރިއަށްދާއިރު، ފިލްމުގެ ނުބައިބައި ރޯލުން ރާމް ޕޮތިނޭނީ ފެންނާނެ ކަމަށް އަޑުތައް ފެތުރިފައިވީ ނަމަވެސް، އެކަން އަދި ރަސްމީކޮށް ކަށަވަރުކޮށްދީފައެއް ނުވެއެވެ. އަދި މި ފިލްމުގައި ނަޔަންތާރާ އަދާކުރާ ރޯލާ ގުޅޭ އެއްވެސް ތަފުސީލެއް ފިލްމު އުފައްދާ ފަރާތުން އަދި ހާމަކޮށްފައެއް ނުވެއެވެ.